主页 > G卫生活 >【轮证赢家】再追恒指牛 >

【轮证赢家】再追恒指牛

2020-06-13  点赞421   浏览量:709
【轮证赢家】再追恒指牛放大图片

噚日朝早拣定只恒指牛(57457)出嚟,拣嘅时候同当时恒指有逾600点差距,不过以嗰时市况仲未适合落场,唯有就比啲耐性去等啦,不过好彩都唔使等好耐,讲紧只係等到11点30分至上半场完前结为止,恒指5分钟图SlowSTC(14,3)落到超卖水平,呢个时候可以趁机将(57457)送落场,按当时(57457)高低位做过$0.063/$0.056,平均买入价就係$0.0595。

如果选择Day trade嘅话,其实喺下半场恒指开市后至3点半前都有几个唔同嘅收割时间,分别係2点15分至2点25分、2点40分至2点50分同埋3分15分至3点25分。其实就算唔按呢三段时间走货,讲紧係由第一段时间开始嘅2点15分至最后一段时间嘅披,即3点25分计,(57457)期间高低位$0.074/$0.067,平均卖出价就係$0.0705,一来一回,day trade平均赚幅 就有18.5%。

若然朝早嗰转追唔到只(57457)嘅话,其实见到尾市15分钟恒指5分钟图无啦啦向下大插,呢个时间你都可以选择入市,不过就好肯定係过夜,所以注码上都要作出少少控制。至今朝开市可能都仲未兴奋,因为讲紧恒指都只係升145点;但到依家10点19分,恒指升275点,做紧26939点,熊证头两层(26700至26799点,同26800至26899点),呢度有相当于920张期指,而变相依家最贴价嘅就係26900至2699点,重货区嚟架,有相当于1016张期指,但按依家10点25分,恒指最高做过26950点计,呢过千张期指睇怕迟早会被杀晒。

如果按恒指牛熊证街货图嚟计嘅话,再向上走嘅机会好高,事关恒指现价都已经企喺近熊证街货区嗰边,而下方牛证最贴价讲紧係26100至26199点,呢度有相当于200张期指,货唔多都唔紧要,但仲要远嗰吓先至麻烦。

「咁咪可以再追恒指牛或者Call啰?」唔好住,睇埋恒指日线图先啦,今日恒指再弹多200几接近300 ,粒烛已经弹咗上去保历加通道顶(26904点),依家仲keep住喺条顶上面,同步见下方SlowSTC(14,3)%K线同%D线都见「9」字头,即上到严重超买水平,即係话暂时睇恒指已经呈超买嘅迹象。

咁当然啦,SlowSTC(14,3)係一组比较短线同敏感度高嘅指标,佢绝对可以超买再超买再超买都仲得,细看保历加通道口其实由此前嘅收窄逐步拓阔中,即开始有多少少嘅空间比大市去行;要再Call上去唔係唔得,小心嘅係头顶条100天线(27047点)先啰。

贴价牛槓桿係高,但啲街货同样都係咁高,为免证价受到街货影响,宁愿拣远少少嘅证,例如恒指牛(57723), 收回价25992点,同现有逾900点差距,28倍槓桿算係OK高,但胜在街货只有1.19%。见恒指5分钟图依家喺严重超买位见有少少回落嘅迹象,再追牛嘅要等阵。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家

相关阅读