主页 > O品生活 >【轮证赢家】俾啲耐性等市回 >

【轮证赢家】俾啲耐性等市回

2020-06-13  点赞780   浏览量:522
【轮证赢家】俾啲耐性等市回放大图片

呢两日个市太闷啦,坦白讲都真係无乜心机,为免重蹈前日见到恒指5分钟图SlowSTC(14,3)上到中轴水平,驳等上超买走货但失败,仲差啲甩唔到手嘅覆辙,见恒指牛(57414)做到接近/高过平均买入价少少,于是就选择收手。以恒指5分钟图嘅SlowSTC(14,3)喺噚日朝早10点55分至11点5分时见中轴位,同步(57414)高低位见过$0.07/$0.067,平均卖出价就係$0.0685,账面打个和,斋输手续费。

闷市从来都係对炒轮不利,因为如果见到之前大市上行而买入Call嘅话,即使之后个市只係跌得嗰几十点,但由于波幅减少嘅关係,有机会从而影响到引伸波幅下降,咁就会影响到轮价;至于牛熊证方面,由于证价受波幅影响唔太多,所以可以话係无乜影响,只係纯粹揸住只证会觉得闷啫。其实呢啲市最好就係玩界内证,但可惜界内证喺市场上都仲算係新product,唔知有几多人认识,亦唔知识嘅人当中有几个愿意玩,噚日开个界内证search engine出嚟,几乎全数无成交,就知道界内证7月到依家都仲係好冷清啦。

依家9点58分,新闻组同事未返齐人,不过距离林郑发表《施政报告》仲有一个钟头到,应该都仲赶得切嘅。至于恒指,今朝开市升50点,报26553点;至依家见升幅扩大,至133点,做紧26637点。

日线图上见恒指仍处于保历加上升通道里面,而保历加通道口就继续收窄中,暗示大市就算再有力上/下行,但可行嘅空间已经有限。同步下方SlowSTC(14,3)%K线同%D线已经踩入超买至严重超买水平,就算今日见条恒指波幅指数(VHSI)回升,但暂时都係呈高开低收,闷局情况暂时不变。

再睇埋恒指牛熊证街货图,牛熊两边今日都无新增街货层,而熊证最贴价嘅係26600至26699点,呢度有相当于217张期指,数土虽然唔算多,但以依家10点6分,恒指最高暂时做过26653点计,已经杀咗呢层里面部份街货。将呢层熊证街货拆做以50点为一层去睇(坊间有轮商係有提供以50点为一层街货嘅数架),26600至26649点呢度其实就只有21张期指,而26650至26699点呢度先至有196张期指,咁即係话大市就算波幅唔高,但如要果要上去食埋呢百零张期指街货嘅话,对佢嚟讲难度都唔算好大;只係问题在于係唔係要赶住今日杀埋啫。

至于牛证最贴价就係26100至26199点,只有相当于161张期指,以现价(10点10分mark底26639点)计,要大市落返去呢层牛证嘅门口位(即26199点),讲紧要掉头下行440点。唔係话个市唔会跌,只係现阶段大市似乎未有啲咩理由咁向下行。恒指牛(57457),收回价25998点,同现价有逾600点差距,係贴价堆牛证当中,敏感度高、街货少、成交活跃,依家10点20分,见恒指升幅慢慢收窄,应该5分钟图SlowSTC(14,3)由超买準备回落到超卖水平啦,见超卖时就可以小注入市,所以依家俾多少少耐性啦。

今日下昼小妹要去牙医度覆诊呀,所以【轮证下半Part】要暂停一日,听日见。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家

相关阅读